ಹೊಸಪುಸ್ತಕ

ಮಗ್ಗ

ಕಥಾ ಸಂಕಲನ

ಸ್ನೇಹಲತಾ ದಿವಾಕರ್ ಕುಂಬ್ಳೆ

ಪುಟ: 92, ಬೆಲೆ: ರೂ.110

ಪ್ರಥಮ ಮುದ್ರಣ: 2020

ಸಿರಿವರ ಪ್ರಕಾಶನ, ಲಕ್ಷ್ಮೀನಾರಾಯಣಪುರ

ಬೆಂಗಳೂರು 560021

ಹತ್ತು ಕಥೆಗಳನ್ನು ಒಳಗೊಂಡಿರುವ ಈ ಸಂಕಲನ, ಮೂರು ದಶಕಗಳ ನಡುವಿನ ಕೊಂಡಿಯಂತೆ ಕಾಣಿಸುತ್ತದೆ. ಮೊದಲ ಕಥೆ 1989ರಲ್ಲಿ ರಚಿತವಾಗಿದ್ದರೆ ಕೊನೆಯ ಕಥೆ 2018ರಲ್ಲಿ ರಚಿತವಾಗಿದ್ದು, ಇಲ್ಲಿನ ಕಥೆಗಳಲ್ಲಿ ಲೇಖಕಿಯ ಊರಾದ ಕಾಸರಗೋಡಿನ ಜನರ ಆಡುಕನ್ನಡದ ಸೊಗಡು ಎದ್ದು ಕಾಣುತ್ತದೆ. ಎಲ್ಲಾ ಕಥೆಗಳೂ ಭಿನ್ನವಾಗಿ, ಮಲಯಾಳಂ ವಾತಾವರಣದ ಪ್ರಭಾವವನ್ನು ಸೂಚಿಸುತ್ತವೆ. ಹಸಿವು, ಕಾದವಳು ರಾಧೆ, ಬದುಕು ಮುಂತಾದ ಕಥೆಗಳು ತೀವ್ರವಾಗಿ ಕಾಡಬಲ್ಲವು.

ಲಹರಿ

(ಗಜಲ್‌ಗಳು, ದ್ವಿಪದಿಗಳು ಮತ್ತು ಹೈಕುಗಳು)

ಸಿದ್ಧರಾಮ ಹಿರೇಮಠ

ಪುಟ: 92, ಬೆಲೆ: ರೂ.110

ಪ್ರಥಮ ಮುದ್ರಣ: 2019

ರೂಪ ಪ್ರಕಾಶನ, ಮೈಸೂರು 570004

ಈ ಸಂಕಲನ ಒಟ್ಟು 77 ಗಜಲ್, ದ್ವಿಪದಿಗಳು ಹಾಗೂ 45 ಹೈಕುಗಳನ್ನು ಒಳಗೊಂಡಿದೆ. ಕಡಿಮೆ ಸಾಲುಗಳಲ್ಲಿ ಭಾವಗಳನ್ನು ಹಿಡಿದಿಡುವ ಕವಿಯ ಪ್ರಯತ್ನ ಇಲ್ಲಿ ಕಾಣಿಸುತ್ತದೆ. ಗಜಲ್‌ನ ಜೊತೆ ಜೊತೆಗೆ ದ್ವಿಪದಿಗಳು ಹಾಗೂ ಹೈಕುಗಳಲ್ಲೂ ಭಾವತೀವ್ರವಾದ ಆಲೋಚನೆಗಳು ಕಾಣಸಿಗುತ್ತವೆ. ಕವಿಯ ಮೊದಲ ಕೃತಿಯ ಹೊರಬಂದ ಹತ್ತು ವರ್ಷಗಳ ಬಳಿಕ ಈ ಕೃತಿ ಹೊರಬರುತ್ತಿದ್ದು, ಸುದೀರ್ಘ ಅವಧಿಯ ಅನುಭವಗಳು ಇಲ್ಲಿನ ಸಾಲುಗಳಲ್ಲಿ ಅಡಕಗೊಂಡಿವೆ.

ನಿನ್ನ ಧ್ಯಾನಿಸಿದ ಮೇಲೂ

ಗಜಲ್‌ಗಳು

ನಿರ್ಮಲಾ ಶೆಟ್ಟರ

ಪುಟ: 80, ಬೆಲೆ: ರೂ.80

ಪ್ರಥಮ ಮುದ್ರಣ: 2019

ರೂಪ ಪ್ರಕಾಶನ, ಮೈಸೂರು 570004

ಈ ಸಂಕಲನದಲ್ಲಿರುವ ಗಜಲ್‌ಗಳು ತನ್ನ ಗಟ್ಟಿತನದಿಂದಾಗಿ ಥಟ್ಟನೆ ಸೆಳೆದುಬಿಡುತ್ತವೆ. ಬದುಕಿನ ಭಾವಗಳನ್ನು ಕೆಲವೇ ಸಾಲುಗಳಲ್ಲಿ ಹಿಡಿದಿಡುವಲ್ಲಿ ಕವಯಿತ್ರಿ ಸಮರ್ಥರಾಗಿದ್ದಾರೆ. ಸ್ತ್ರೀ ಸಂವೇದನೆ, ಮಹಿಳಾ ದೃಷ್ಟಿಕೋನದಿಂದ ಕೆಲವೊಂದು ಗಜಲ್‌ಗಳು ಮನಮುಟ್ಟಿದರೆ, ಇನ್ನು ಕೆಲವು ತನ್ನ ಅದಮ್ಯ ಕನಸುಗಳಿಗಾಗಿ ಹೆಚ್ಚು ಆಪ್ತವೆನಿಸುತ್ತವೆ.

ಬೆಳಕಿನ ಸೌರಭ

ಮೂಲ: ಪ್ರೊ.ಸಿ.ಎನ್.ಶ್ರೀನಾಥ್

ಅನುವಾದ: ಪ್ರೊ.ನಾ.ದಯಾನಂದ

ಪುಟ: 133, ಬೆಲೆ: ರೂ.100

ಪ್ರಥಮ ಮುದ್ರಣ: 2019

ಧ್ವನ್ಯಾಲೋಕ ಪಬ್ಲಿಕೇಶನ್ಸ್, ಮೈಸೂರು 570006

ಇದು ಇಂಗ್ಲಿಷ್ ಕವಿತೆಗಳ ಅನುವಾದ ಕೃತಿ. 53 ಕವಿತೆಗಳಿರುವ ಈ ಸಂಕಲನದಲ್ಲಿ ಅನುವಾದದ ಗ್ರಹಿಕೆಗೆ ಅನುಕೂಲವಾಗುವಂತೆ ಮೂಲ ಇಂಗ್ಲಿಷ್ ಕವಿತೆಗಳನ್ನೂಪ್ರಕಟಿಸಲಾಗಿದೆ. ಕವಿ ಸಂದರ್ಶಿಸಿದ ಸ್ಥಳ, ಸಂದರ್ಭಗಳ ಕುರಿತು ಕೆಲವೊಂದು ಕವಿತೆಗಳನ್ನು ಇಲ್ಲಿ ಕಾಣಬಹುದು. ಕವಿ ಕೀಟ್ಸ್ ಕುರಿತಂತೆ ಕೀಟ್ಸ್ ಎಂಬ ಕವಿತೆ, ಬಸವಣ್ಣನ ಕುರಿತು ಕಲ್ಯಾಣ ವಚನ, ನಾಸಾ, ಕ್ಯಾಂಡಿ ಕುರಿತು, ತಮ್ಮ ಅನುಭವದ, ಕಾಣ್ಕೆಗಳ ವಿಷಯಗಳು ಇಲ್ಲಿ ಕವಿತೆಗಳಾಗಿವೆ. ಅನುವಾದಕರು ಈ ಕವಿತೆಗಳನ್ನು ಸರಳ, ಸುಲಲಿತವಾಗಿಸಲು ಪ್ರಯತ್ನಿಸಿದ್ದು ಗೋಚರಿಸುತ್ತದೆ.

****

ಸಾಮಾಜಿಕ ಕ್ರಾಂತಿಯ ಹರಿಕಾರ

ಲೋಕರಾಜ ಸಯಾಜಿರಾವ ಗಾಯಕವಾಡ

ಮೂಲ: ಬಾಬಾ ಭಾಂಡ

ಅನುವಾದ: ಚಂದ್ರಕಾಂತ ಪೋಕಳೆ

ಪುಟ: 80, ಬೆಲೆ: ರೂ.65

ಪ್ರಥಮ ಮುದ್ರಣ: 2019

ಈ ಕೃತಿಯು ಸಯಾಜಿರಾವ ಗಾಯಕವಾಡ ಅವರ ಜೀವನದ ಕುರಿತು ಸಂಕ್ಷಿಪ್ತ ಮಹಿತಿಯನ್ನು ಒಳಗೊಂಡಿದೆ. ಆಕಸ್ಮಿಕವಾಗಿ ರಾಜನಾದ ಸಯಾಜಿರಾವ ಕಡ್ಡಾಯ ಶಿಕ್ಷಣ, ಜೀತ ವಿಮೋಚನೆ, ಅಸ್ಪೃಶ್ಯತೆ ನಿವಾರಣೆ ಮುಂತಾದ ಸಾಮಾಜಿಕ ಉನ್ನತಿಯ ಕಾರ್ಯಗಳಿಗಾಗಿ ಶ್ರಮವಹಿಸಿದ್ದರು. ಪ್ರಜೆಗಳ ಕುರಿತ ಕಾಳಜಿ, ಯೋಜನಾಬದ್ಧವಾದ ಆಡಳಿತದ ಕಾರಣಕ್ಕಾಗಿ ನೆನಪಿನಲ್ಲಿ ಉಳಿಯುವ ಸಯಾಜಿ, ಹಲವಾರು ಮಹನೀಯ ನಾಯಕರಿಗೆ ಆದರ್ಶ ವ್ಯಕ್ತಿಯಾಗಿದ್ದರು. ಸಯಾಜಿರಾವ ಕುರಿತು ಸಂಕ್ಷಿಪ್ತ ಪರಿಚಯ ಒದಗಿಸಬಲ್ಲ ಕೃತಿಯಿದು.

ಕರ್ನಾಟಕ ವಿಧಾನಸಭೆಯಲ್ಲಿ ಬಿ.ವಿ.ಕಕ್ಕಿಲ್ಲಾಯ

ಸಂಪಾದಕ: ಡಾ.ಬಿ.ಶ್ರೀನಿವಾಸ ಕಕ್ಕಿಲ್ಲಾಯ

ಪುಟ: 652, ಬೆಲೆ: ರೂ.450

ಪ್ರಥಮ ಮುದ್ರಣ: 2019

ಹಿರಿಯ ಸ್ವಾತಂತ್ರ್ಯ ಹೋರಾಟಗಾರ, ಕಮ್ಯುನಿಸ್ಟ್ ನಾಯಕರಾಗಿದ್ದ ಬಿ.ವಿ.ಕಕ್ಕಿಲ್ಲಾಯ ಅವರು ದಕ್ಷಿಣ ಕನ್ನಡ ಜಿಲ್ಲೆಯ ಬಂಟ್ವಾಳದ ಶಾಸಕರಾಗಿ ರಾಜ್ಯ ವಿಧಾನಸಭೆಯಲ್ಲಿ ಎತ್ತಿದ ಹಲವಾರು ಮಹತ್ವಪೂರ್ಣ ಪ್ರಶ್ನೆ, ವಿಚಾರಗಳನ್ನು ಈ ಕೃತಿ ಒಳಗೊಂಡಿದೆ. ನಿಜವಾದ ಜನಪ್ರತಿನಿಧಿಯ ಜವಾಬ್ದಾರಿ, ಆತನ ಮುಂದಿರುವ ಸವಾಲುಗಳನ್ನು ಎದುರಿಸುವ ಬಗೆ, ಜನಸಾಮಾನ್ಯರನ್ನು, ಬಡವರ್ಗದ ಜನರನ್ನು ಪ್ರತಿನಿಧಿಸುವ ರೀತಿ ಇವೆಲ್ಲವನ್ನೂ ಕಲಿಸಿಕೊಡುವ ವ್ಯಕ್ತಿತ್ವ ಬಿ.ವಿ.ಕಕ್ಕಿಲ್ಲಾಯ ಅವರದ್ದು. ಇಲ್ಲಿನ ಅವರ ಭಾಷಣಗಳು ಅವರ ವ್ಯಕ್ತಿತ್ವವನ್ನು ಕಟ್ಟಿಕೊಡುತ್ತದೆ.ಉತ್ತಮ ಆಡಳಿತದ ದೃಷ್ಟಿಯಂದ ಪರಿಗಣಿಸಬೇಕಾದ ಹಲವಾರು ಮಹತ್ವಪೂರ್ಣ ಅಂಶಗಳು ಇಲ್ಲಿವೆ.

ಮನುಷ್ಯನ ಮಹಾಯಾನ

ಬಿ.ವಿ.ಕ್ಕಿಲ್ಲಾಯ

ಪುಟ: 224, ಬೆಲೆ: ರೂ.225

ಪ್ರಥಮ ಮುದ್ರಣ: 2019

ಇದು ಬಿ.ವಿ.ಕಕ್ಕಿಲ್ಲಾಯ ಅವರು ಬರೆದ ಕೊನೆಯ ಪುಸ್ತಕ. ಅಪೂರ್ಣವಾಗಿರುವ ಈ ಕೃತಿಯನ್ನು ಕಕ್ಕಿಲ್ಲಾಯ ಅವರಿಗೆ ಪೂರ್ತಿಗೊಳಿಸಲು ಸಾಧ್ಯವಾಗಿಲ್ಲ. ಆದರೂ ಇಲ್ಲಿನ ವಿಚಾರಗಳು ಬಹಳ ಮಹತ್ವದ್ದಾಗಿರುವುದಿರಂದ ಇದನ್ನು ಪ್ರಕಟಿಸಲಾಗಿದೆ. ಮನುಷ್ಯ ಬದುಕಿನ ವಿಕಾಸ, ನಾಗರಿಕತೆ ಹಾಗೂ ಪ್ರಪಂಚದಲ್ಲಿ ಮನುಷ್ಯ ಕಾಣಿಸಿಕೊಳ್ಳುವುದಕ್ಕಿಂತ ಹಿಂದಿನ ಕುತೂಹಲಕಾರಿ ವಿಚಾರಗಳು ಇಲ್ಲಿವೆ. ಲೇಖಕರು ಮುನ್ನುಡಿಯಲ್ಲಿ ಹೇಳಿದಂತೆ, ಸ್ವಾಭಾವಿಕವಾಗಿ ಇದೊಂದು ಹೆಜ್ಜೆಗುರುತುಗಳ ದಾಖಲೆಯಾಗಿದೆ.

ಕನ್ನಡ ಭಾಷೆ-ಬದುಕು

ಎಸ್.ಜಿ.ಸಿದ್ಧರಾಮಯ್ಯ

ಪುಟ: 128, ಬೆಲೆ: ರೂ.125

ಪ್ರಥಮ ಮುದ್ರಣ: 2019

ಇದು ಸಂಪೂರ್ಣವಾಗಿ ಕನ್ನಡದ ಕುರಿತ, ಕನ್ನಡಿಗರ ಬದುಕಿನ ಕುರಿತ ಕಾಳಜಿಯನ್ನು ವ್ಯಕ್ತಪಡಿಸುವ ಕೃತಿ. ಕನ್ನಡ ಶಾಲೆಗಳು ಒಂದೊಂದಾಗಿ ಮುಚ್ಚಲ್ಪಡುತ್ತಿರುವ ಹೊತ್ತಿನಲ್ಲಿ ಲೇಖಕರು ಈ ಕೃತಿಯನ್ನು ಅಂತಹ ಶಾಲೆಗಳಿಗೆ ಹಾಗೂ ಶಿಕ್ಷಣ ವಂಚಿತ, ನತದೃಷ್ಟ ಕನ್ನಡದ ಮಕ್ಕಳಿಗೆ ಅರ್ಪಿಸಿದ್ದಾರೆ. ಇಂಗ್ಲಿಷ್‌ನ ಪ್ರಭುತ್ವ, ಹಿಂದಿ ಹೇರಿಕೆ, ಗಡಿಭಾಗದ ಭಾಷಾ ಸಮಸ್ಯೆಗಳು, ತ್ರಿಭಾಷಾ ಸೂತ್ರ, ಆಡಳಿತ ಭಾಷೆಯಾಗಿ ಕನ್ನಡದ ಅಗತ್ಯ ಹೀಗೆ ಕನ್ನಡಕ್ಕೆ ಸಂಬಂಧಿಸಿ ಹಲವಾರು ಅಡೆತಡೆ, ಆತಂಕಗಳ ಕುರಿತು ಈ ಕೃತಿ ಬೆಳಕು ಚೆಲ್ಲುತ್ತದೆ.

 

ವರ್ತಮಾನ

ಚರಿತ್ರೆಯ ಬೆಳಕಿನಲ್ಲಿ ವರ್ತಮಾನದ ಹೆಜ್ಜೆಗಳು

ಡಾ.ಜಿ.ರಾಮಕೃಷ್ಣ

ಪುಟ: 104, ಬೆಲೆ: ರೂ.100

ಪ್ರಥಮ ಮುದ್ರಣ: 2019

ಇತಿಹಾಸಗಳೇ ಹೆಚ್ಚು ಚರ್ಚೆಯಾಗುತ್ತಿರುವ ವರ್ತಮಾನದ ಈ ಹೊತ್ತಿನಲ್ಲಿ, ಇತಿಹಾಸ, ಪುರಾಣ, ಭಗವದ್ಗೀತೆ, ಮನುಸ್ಮೃತಿ, ರಾಷ್ಟ್ರೀಯತೆ ಮುಂತಾದ ವಿಚಾರಗಳನ್ನು ಮರುಪರಿಶೀಲಿಸುವ ಅಗತ್ಯವನ್ನು ತಿಳಿಸುವ ಕೃತಿಯಿದು. ಹಿರಿಯ ವಿದ್ವಾಂಸ ಜಿ.ರಾಮಕೃಷ್ಣ, ಇಂತಹ ವಿಚಾರಗಳ ಒಳಹೊಕ್ಕು ಹಲವಾರು ಸೂಕ್ಷ್ಮ ಸಂಗತಿಗಳನ್ನು ಸಮಾಜದ ಮುಂದೆ ತೆರೆದಿಡುವ ಪ್ರಯತ್ನ ಮಾಡಿದ್ದಾರೆ. ಆರೋಗ್ಯಕರ ಸಮಾಜದ ನಿರ್ಮಾಣ ಬಯಸುವ ಚಿಂತನೆಗಳು ಇಲ್ಲಿವೆ.

ಎಂಗ್ಟನ ಪುಂಗಿ

ಮೂಲ ಕಥೆ: ಪೂರ್ಣಚಂದ್ರ ತೇಜಸ್ವಿ

ನಾಟಕ ರೂಪಾಂತರ: ಅ.ನಾ.ರಾವ್ ಜಾದವ್

ಪುಟ: 64, ಬೆಲೆ: ರೂ.55

ಪ್ರಥಮ ಮುದ್ರಣ: 2019

ತೇಜಸ್ವಿ ಅವರ ‘ಪರಿಸರದ ಕತೆ’ ಪುಸ್ತಕದ ಕತೆಯಾಗಿರುವ ‘ಎಂಗ್ಟನ ಪುಂಗಿ’ ಇಲ್ಲಿ ನಾಟಕದ ರೂಪ ಪಡೆದಿದೆ. ತೇಜಸ್ವಿಯವರ ಕಥಾಲೋಕದ ಪಾತ್ರಗಳನ್ನೇ ಇಲ್ಲಿಯೂ ಬಳಸಲಾಗಿದೆ. ಮಂದಣ್ಣ, ವಿಜ್ಞಾನಿ,ಮಾರ, ಪ್ಯಾರ ಮುಂತಾದ ಪಾತ್ರಗಳು ಇಲ್ಲಿವೆ. ಆಧುನಿಕ ಬದುಕಿನ ನಡುವೆ ತಮ್ಮ ಹಾದಿ ಸವೆಸಲು ಪಾಡು ಪಡುವ ಎಂಗ್ಟನಂತಹ ಹಲವಾರು ಸಾಮಾನ್ಯ ಜನರು ಸದ್ಯದ ಸಮಾಜದಲ್ಲಿ ಕಾಣಸಿಗುತ್ತಾರೆ. ಅಂತಹ ಜನರನ್ನು ಪ್ರತಿನಿಧಿಸುವ ಈ ಪಾತ್ರ, ಇಡೀ ನಾಟಕದ ಜೀವಾಳವಾಗಿ ನಿಲ್ಲುತ್ತದೆ. ಲೇಖಕರನ್ನು ಸಂಪರ್ಕಿಸಿ ನಾಟಕವನ್ನು ಪ್ರದರ್ಶನಕ್ಕೆ ಉಪಯೋಗಿಸಲು ಅವಕಾಶವಿದೆ.

ಸಮಗ್ರ ಕರ್ನಾಟಕ ದರ್ಶನ

ಸಂಪಾದನೆ: ಎಚ್.ಎಸ್.ಗೋಪಾಲ ರಾವ್

ಪುಟ: 596, ಬೆಲೆ: ರೂ.950

ಪ್ರಥಮ ಮುದ್ರಣ: 2019

ಇದು ರಾಜ್ಯದ ಜಿಲ್ಲೆಗಳ ಮತ್ತು ತಾಲೂಕುಗಳ ಮಾಹಿತಿ ಕೋಶ. ಕರ್ನಾಟಕದ ಎಲ್ಲ ತಾಲೂಕುಗಳಲ್ಲಿನ ಪ್ರಮುಖ ಸ್ಥಳ, ವಾಣಿಜ್ಯ, ವ್ಯವಹಾರ, ಪ್ರವಾಸೋದ್ಯಮ, ಸಾರಿಗೆ, ಸಂಚಾರ ಮುಂತಾದ ವಲಯಗಳ  ಸಮಗ್ರ ಮಾಹಿತಿಯನ್ನು ಈ ಬೃಹತ್ ಕೃತಿ ಒಳಗೊಂಡಿದೆ. ಚಿತ್ರಗಳು, ಅಂಕಿಅಂಶಗಳ ಜೊತೆಗೆ ಎಲ್ಲ ಮಾಹಿತಿಗಳಿಗೂ ಸ್ಪಷ್ಟತೆ ಒದಗಿಸುವ ಪ್ರಯತ್ನ ಮಾಡಲಾಗಿದೆ. ರಾಜ್ಯದ ಕುರಿತ ಮಾಹಿತಿಗಳ ತಿಳಿವಳಿಕೆಗೆ ಅತ್ಯಂತ ಯೋಗ್ಯ ಕೃತಿಯಿದು.

ಚಿನಾರ್ ವೃಕ್ಷದ ಅಳು

ಭಾರತದ ವಿವಿಧ ಭಾಷೆಗಳ ಸಣ್ಣಕತೆಗಳು

ಕನ್ನಡಕ್ಕೆ: ಬಸವರಾಜ ಸಾದರ

ಪುಟ: 96, ಬೆಲೆ: ರೂ.100

ಪ್ರಥಮ ಮುದ್ರಣ: 2019

ಈ ಸಣ್ಣಕಥೆಗಳ ಸಂಕಲನವು ಭಾರತದ ವಿವಿಧ ಭಾಷೆಗಳಲ್ಲಿ ರಚಿತವಾದ ಕಥೆಗಳನ್ನು ಒಳಗೊಂಡಿದೆ. ಮಾನವೀಯ ಸಂಬಂಧಗಳ ಹುಡುಕಾಟ, ಕಳೆದುಹೋಗುತ್ತಿರುವ ಬಂಧಗಳ ಬಗೆಗಿನ ವಿಷಾದತೆ ಇಲ್ಲಿನ ಕಥೆಗಳಲ್ಲಿ ಹರಡಿಕೊಂಡಿವೆ. ಭಾವತೀವ್ರತೆ, ಅನುಕಂಪ ಮುಂತಾದ ಅಂಶಗಳೇ ಇಲ್ಲಿನ ಕಥೆಗಳನ್ನು ಗಟ್ಟಿಗೊಳಿಸುತ್ತವೆ. ಎ.ಕೆ.ರಾಮಾನುಜನ್ ಸಂಪಾದಿಸಿದ ‘ಫೋಕ್ ಟೇಲ್ಸ್ ಫ್ರಮ್ ಇಂಡಿಯಾ’ ಎಂಬ ಜಾನಪದ ಕಥಾ ಸಂಕಲನದಿಂದ ಆಯ್ದ ಒಂದು ಕಥೆಯೂ ಇಲ್ಲಿದೆ. ನಮ್ಮವೇ ಎಂದನಿಸುವಂತೆ ಇಲ್ಲಿನ ಕಥೆಗಳನ್ನು ಬಸವರಾಜ ಸಾದರ ಅವರು ಕನ್ನಡೀಕರಿಸಿದ್ದಾರೆ.

ಮೇಲಿನ ಎಂಟು ಕೃತಿಗಳ ಪ್ರಕಾಶಕರು

ನವಕರ್ನಾಟಕ ಪಬ್ಲಿಕೇಷನ್ಸ್ ಪ್ರೈವೇಟ್ ಲಿಮಿಟೆಡ್.

ಎಂಬೆಸಿ ಸೆಂಟರ್, ಕ್ರೆಸೆಂಟ್ ರಸ್ತೆ, ಬೆಂಗಳೂರು. 560001.

Leave a Reply

Your email address will not be published.