2021ರಲ್ಲಿ ಕೋವಿಡ್-19 ಅಂತ್ಯ?

-ಡಾ.ಕಿರಣ್ ವಿ.ಎಸ್.

ಹೊಸ ವರ್ಷದಲ್ಲಿ ಕೋವಿಡ್-19 ವಿರುದ್ಧ ಸಾಲು-ಸಾಲು ಲಸಿಕೆಗಳು ದೊರೆಯಲಿವೆ. ಜೊತೆಗೆ, ಕೊರೊನಾ ಸೋಂಕಿನ ವಿರುದ್ಧ ಪರಿಣಾಮಕಾರಿ ಔಷಧವೂ ಲಭ್ಯವಾಗಬಹುದು. ಆ ನಿಟ್ಟಿನಲ್ಲೂ ಸಾಕಷ್ಟು ಕೆಲಸಗಳು ನಡೆಯುತ್ತಿವೆ. ವೈದ್ಯ ಜಗತ್ತು ಈಗ ಕೋವಿಡ್-19 ಚಿಕಿತ್ಸೆಯ ಬಗ್ಗೆ ಗಣನೀಯ ಅನುಭವ ಗಳಿಸಿದೆ. ಇವು 2021ರ ಆಶಾದಾಯಕ ಸಂಗತಿಗಳು.

ಮಾನವ ಇತಿಹಾಸದಲ್ಲಿ 2020ನೆಯ ವರ್ಷ `ಕೋವಿಡ್’ ವರ್ಷವೆಂದೇ ಹೆಸರಾಗಲಿದೆ. ಜಗತ್ತಿನ ಸಂಕೀರ್ಣ ರಚನೆಯನ್ನು ಅಲುಗಾಡಿಸಿದ, ಆರೋಗ್ಯ ವ್ಯವಸ್ಥೆಯ ಶೈಥಿಲ್ಯಗಳನ್ನು ಅನಾವರಣಗೊಳಿಸಿದ, ಮಾನವ ಸಂಬಂಧಗಳ ಸೂಕ್ಷ್ಮಗಳನ್ನು ಒರೆಗೆ ಹಚ್ಚಿದ ಕೀರ್ತಿ ಈ ವರ್ಷದ್ದು! `ಈ ವರ್ಷ ಎಂದು ಮುಗಿದೀತು?’ ಎನ್ನುವ ಭಾವದ ಹಿಂದೆ `ಕೋವಿಡ್ ಎಂದು ಕೊನೆಗೊಂಡೀತು?’ ಎನ್ನುವ ಪ್ರಶ್ನೆಯ ಛಾಯೆಯಿದೆ. ಇದಕ್ಕೆ ಉತ್ತರ ಹುಡುಕುವ ಮುನ್ನ ಒಂದಷ್ಟು ಹಿನ್ನೆಲೆ ಅರಿಯಬೇಕು.

ಸಾಂಕ್ರಾಮಿಕ ಕಾಯಿಲೆ ಹರಡುವ ಸೂಕ್ಷ್ಮಜೀವಿಯೊಂದು ದೇಹವನ್ನು ಪ್ರವೇಶಿಸಿದಾಗ ಏನಾಗುತ್ತದೆ? ದೇಹದಲ್ಲಿ ರೋಗದ ವಿರುದ್ಧ ಬಡಿದಾಡುವ ರಕ್ಷಕ ವ್ಯವಸ್ಥೆಯಿದೆ. ಅದು ಚುರುಕಾಗಿದ್ದರೆ, ರೋಗಕಾರಕ ಸೂಕ್ಷ್ಮಜೀವಿಯ ವಿರುದ್ಧ ಕೂಡಲೇ ದಾಳಿ ಆರಂಭಿಸುತ್ತದೆ. ಈ ಸಂಗ್ರಾಮದಲ್ಲಿ ರಕ್ಷಕ ವ್ಯವಸ್ಥೆಯದ್ದು ಮೇಲುಗೈಯಾದರೆ, ಕಾಯಿಲೆ ನಮ್ಮನ್ನು ಹೆಚ್ಚು ಕಾಡುವುದಿಲ್ಲ; ಚೂರು-ಪಾರು ತೊಂದರೆ ಮಾಡಿ, ಇಲ್ಲವಾಗುತ್ತದೆ! ಸಂಘರ್ಷದಲ್ಲಿ ರೋಗಕಾರಕ ಸೂಕ್ಷ್ಮಜೀವಿ ಗೆದ್ದರೆ, ಕಾಯಿಲೆ ಶರೀರವನ್ನು ಸಾಕಷ್ಟು ಘಾಸಿ ಮಾಡುತ್ತದೆ. ಆಗ, ಶರೀರಕ್ಕೆ ಹೊರಗಿನಿಂದ ರಕ್ಷಣೆ ಒದಗಿಸಬೇಕು. ಇಂತಹ ರಕ್ಷಣೆಯೆಂದರೆ ಸೂಕ್ಷ್ಮಜೀವಿಯನ್ನು ಕೊಲ್ಲಬಲ್ಲ ಔಷಧ, ರಕ್ಷಕ ವ್ಯವಸ್ಥೆಯನ್ನು ಚೇತರಿಸುವ ಪೂರಕ ಚಿಕಿತ್ಸೆ, ಮತ್ತು ಶರೀರಕ್ಕೆ ಈಗಾಗಲೇ ಆಗಿರುವ ಘಾಸಿಯ ನಿಯಂತ್ರಣ. ರೋಗದ ಆರಂಭದಲ್ಲಿ ಹಾನಿಯ ಪ್ರಮಾಣ ಮಿತವಾಗಿರುವಾಗಲೇ ಚಿಕಿತ್ಸೆ ಪಡೆದಷ್ಟೂ ಚೇತರಿಸಿಕೊಳ್ಳುವ ಸಾಧ್ಯತೆಗಳು ಅಧಿಕ. ಕೋವಿಡ್-19 ಎಂದೇ ಅಲ್ಲ; ಯಾವುದೇ ಕಾಯಿಲೆಯ ಚಿಕಿತ್ಸೆಯ ಆಧಾರ ಇದೇ.

ಕೋವಿಡ್-19ರ ಪರಿಸ್ಥಿತಿ ವಿಭಿನ್ನ. ಇದು ಹಳೆಯ ಕೊರೊನಾ ವೈರಸ್ಸಿನ ಹೊಸ ಸ್ವರೂಪ; ಜಗತ್ತಿಗೆ ಹಿಂದೆ ಪರಿಚಯವಿಲ್ಲದ ಕಾಯಿಲೆ. ದುರದೃಷ್ಟವಶಾತ್, ಕೋವಿಡ್-19 ವೈರಸ್ಸನ್ನು ಕೊಲ್ಲಬಲ್ಲ ನಿಷ್ಕೃಷ್ಟ ಔಷಧ ಇನ್ನೂ ಪತ್ತೆಯಾಗಿಲ್ಲ. ರಕ್ಷಕ ವ್ಯವಸ್ಥೆ ಸಮರ್ಥವಾಗಿರುವವರು ಕೋವಿಡ್-19 ಕಾಯಿಲೆ ತಗುಲಿದರೂ ಹೆಚ್ಚು ಘಾಸಿಯಿಲ್ಲದೆ ಗುಣವಾಗುತ್ತಾರೆ. ಆದರೆ, `ಇಂತಹುದೇ ನಿರ್ದಿಷ್ಟ ಮಂದಿಗೆ ಅಪಾಯವಿಲ್ಲ’ ಎಂದು ಪ್ರತ್ಯೇಕಿಸುವುದು ಅಸಾಧ್ಯ. ಹೀಗಾಗಿ, ಔಷಧವಿಲ್ಲದ ಕೋವಿಡ್-19 ಕಾಯಿಲೆ ಬಾರದಂತೆ ಎಚ್ಚರವಹಿಸುವುದೇ ಅತ್ಯಂತ ಸುರಕ್ಷಿತ. ಮಾಸ್ಕ್ ಧರಿಸುವ, ಸಾಮಾಜಿಕ ಅಂತರ ಕಾಯ್ದುಕೊಳ್ಳುವ, ವೈಯಕ್ತಿಕ ಶುಚಿತ್ವದ ನಿಗಾ ಇಡುವ ವಿಧಾನಗಳು ಪಾಲನೆಯಾಗುತ್ತಿವೆ. ಅವೆಲ್ಲಾ ಆಯಾ ಕ್ಷಣದ ರಕ್ಷಣೆಗಳು. ಕೋವಿಡ್-19 ವಿರುದ್ಧ ಶರೀರದಲ್ಲಿ ವ್ಯವಸ್ಥಿತ ರಕ್ಷಣೆ ಬೆಳೆಸಿಕೊಳ್ಳುವುದು ದೀರ್ಘಾವಧಿ ವಿಧಾನ. ಇದನ್ನು ಸಾಧಿಸಲು ಲಸಿಕೆಗಳು ಬೇಕು.

ಕೋವಿಡ್-19 ಲಸಿಕೆಗಳ ಬೆಳವಣಿಗೆ ತೀವ್ರಗತಿಯಲ್ಲಿದೆ; ಸಂಬಂಧಿಸಿದ ಪರೀಕ್ಷೆಗಳು ಬಹುತೇಕ ಪೂರ್ಣಗೊಂಡು, ಮಾರುಕಟ್ಟೆಗೆ ದಾಂಗುಡಿಯಿಡಲಿವೆ. ಕೆಲವು ಪ್ರಮುಖ ಲಸಿಕೆಗಳನ್ನು ಪರಿಶೀಲಿಸಬಹುದು.

ಅಸ್ಟ್ರಾ-ಝೆನಕ ಕಂಪನಿಯ ಆಕ್ಸ್’ಫರ್ಡ್ ವಿಶ್ವವಿದ್ಯಾಲಯದ ChAdOx1-S-nCoV-19 ಲಸಿಕೆ, ಚಿಂಪಾಂಜಿಗಳಲ್ಲಿ ಶೀತ ಉಂಟು ಮಾಡುವ ಒಂದು ವೈರಸ್ಸಿನ ದುರ್ಬಲ ರೂಪ. ಜೆನೆಟಿಕ್ ರೂಪಾಂತರ ತಂತ್ರಜ್ಞಾನವನ್ನು ಉಪಯೋಗಿಸಿ, ಮನುಷ್ಯರಲ್ಲಿ ಕಾಯಿಲೆ ತಾರದಂತೆ ಇದನ್ನು ಬದಲಾಯಿಸಲಾಗಿದೆ. ಕೊರೊನಾ ವೈರಸ್ ಮೇಲ್ಮೈನ ಮುಳ್ಳಿನಂತಹ ರಚನೆಗೆ    (ಚಿತ್ರ-1) ಕಾರಣವಾಗುವ ಜೆನೆಟಿಕ್ ಮಾಹಿತಿಯನ್ನು ಈ ರೂಪಾಂತರಿತ ವೈರಸ್ಸಿಗೆ ಉಣಿಸಲಾಗಿದೆ. ಇದು ಶರೀರದ ಜೀವಕೋಶಗಳನ್ನು ಸೇರಿದಾಗ, ಕೊರೊನಾವೈರಸ್ ಮೇಲ್ಮೈನ ಮಾದರಿಯ ಮುಳ್ಳುಗಳನ್ನು ಕೋಶಗಳ ಮೇಲೆ ಉತ್ಪಾದಿಸುತ್ತದೆ. ಅದರಿಂದ ರಕ್ಷಕ ವ್ಯವಸ್ಥೆ ಪ್ರಚೋದನೆಗೊಂಡು ವೈರಸ್ ವಿರುದ್ಧ ಸೆಣಸಾಡುವ ಶಕ್ತಿಯನ್ನು ಗಳಿಸಿಕೊಳ್ಳುತ್ತದೆ.

 

ಮುಂದೊಮ್ಮೆ ಕೋವಿಡ್-19 ಸೋಂಕು ತಗುಲಿದರೆ, ಅದನ್ನು ಎದುರಿಸಲು ಶರೀರ ಮೊದಲೇ ಸನ್ನದ್ಧ ವಾಗಿರುತ್ತದೆ. ಹೀಗಾಗಿ, ಕೋವಿಡ್-19 ರೋಗ ತೀವ್ರವಾಗುವ ಮುನ್ನವೇ ರಕ್ಷಕ ವ್ಯವಸ್ಥೆ ಅದನ್ನು ನಿಗ್ರಹಿಸುತ್ತದೆ. ಇಂತಹ ರೂಪಾಂತರಿತ ಲಸಿಕೆ ಈಗಾಗಲೇ ಝಿಕಾ ವೈರಸ್ ನಿಯಂತ್ರಣದಲ್ಲಿ ಪ್ರಯೋಗವಾಗಿದೆ. ನಾಲ್ಕು ವಾರಗಳ ಅಂತರದಲ್ಲಿ ಎರಡು ಬಾರಿ ಚುಚ್ಚಿಸಿಕೊಂಡರೆ, ಲಸಿಕೆಯ ಪರಿಣಾಮ ಶೇಕಡಾ 90 ಎಂದು ಅಂದಾಜು. ಲಭ್ಯವಿರುವ ತಂತ್ರಜ್ಞಾನ ಬಳಸಿರುವುದರಿಂದ ಬೆಲೆ ಅಗ್ಗ. ಇದನ್ನು ಶೇಖರಿಸುವ ವ್ಯವಸ್ಥೆ ಸರಳ. ಈಗಾಗಲೇ ಇರುವ ಲಸಿಕೆ ಶೇಖರಣೆಯ ವ್ಯವಸ್ಥೆಯೇ ಸಾಕು.

ಕೋವಿಡ್-19 ಮೇಲ್ಮೈ ಮುಳ್ಳುಗಳು

ಈಗ ಪ್ರಚಾರದಲ್ಲಿ ಇರುವ ಫೈಝರ್ ಕಂಪನಿಯ ಃioಓಖಿeಛಿh ಲಸಿಕೆ ಮತ್ತು ಅಮೆರಿಕನ್ ಬಯೊಟೆಕ್ ಕಂಪನಿಯ ಮೊಡೆರ್ನ ಲಸಿಕೆಗಳು ಆರ್.ಎನ್.ಎ ಆಧಾರಿತವಾದ್ದವು (ಚಿತ್ರ-2). ಕೋವಿಡ್-19 ಒಡಲಲ್ಲಿ ಇರುವುದು ಆರ್.ಎನ್.ಎ. ಎಂಬ ಜೀವದ್ರವ್ಯ. ಕೋವಿಡ್-19ರ ಆರ್.ಎನ್.ಎ ರಚನೆಯನ್ನು ಪ್ರಯೋಗಾಲಯದಲ್ಲಿ ಪುನರ್ನಿರ್ಮಾಣ ಮಾಡ ಲಾಗುತ್ತದೆ. ಇದನ್ನು ಜಿಡ್ಡಿನ ಪದರ ಉಳ್ಳ ನ್ಯಾನೋ ಕೋಶಗಳಲ್ಲಿ ಹುದುಗಿಸಿ ಚುಚ್ಚಿದರೆ, ಅದು ಶರೀರದ ಜೀವಕೋಶಗಳಲ್ಲಿ ಸೇರಿ, ತನ್ನಲ್ಲಿರುವ ಆರ್.ಎನ್.ಎ ನೆರವಿನಿಂದ ಕೋಶಗಳ ಮೇಲೆ ಕೊರೊನಾ ವೈರಸ್ ಮೇಲ್ಮೈನಂತಹ ಮುಳ್ಳುಗಳನ್ನು ಉತ್ಪಾದಿಸುತ್ತದೆ.

ಇಂತಹ ಕೋಶಗಳನ್ನು ರಕ್ಷಕ ವ್ಯವಸ್ಥೆ ಕೋವಿಡ್-19 ಕೋಶಗಳು ಎಂದೇ ಭಾವಿಸಿ, ಅವನ್ನು ಹಣಿಯಲು ಸಾಮಗ್ರಿಯನ್ನು ಸಿದ್ಧಮಾಡಿಕೊಳ್ಳುತ್ತವೆ. ಹೀಗೆ ಪೂರ್ವಸನ್ನದ್ಧವಾದ ರಕ್ಷಕ ವ್ಯವಸ್ಥೆ, ಮುಂದೆ ಅಸಲೀ ಕೋವಿಡ್-19 ವೈರಸ್ ಶರೀರಕ್ಕೆ ನುಗ್ಗಿದಾಗ ಅದನ್ನು ಕೂಡಲೇ ಮನಗಂಡು ನಾಶ ಮಾಡುತ್ತವೆ. 3-4 ವಾರಗಳ ಅಂತರದಲ್ಲಿ ಎರಡು ಬಾರಿ ಚುಚ್ಚಿದರೆ ಶೇಕಡಾ 90-95 ಪರಿಣಾಮಕಾರಿ ಎನ್ನಲಾಗಿದೆ. ಆಧುನಿಕ ತಂತ್ರಜ್ಞಾನವಾದ್ದರಿಂದ ಇದರ ಬೆಲೆ ಹೆಚ್ಚು; ಶೇಖರಣೆಗೆ ತೀರಾ ಕಡಿಮೆ ತಾಪಮಾನ ಬೇಕು. ಇವುಗಳನ್ನು ವ್ಯಾಪಕವಾಗಿ ಬಳಸಲು ಮೊದಲು ನಮ್ಮಲ್ಲಿ ಇರುವ ಲಸಿಕೆ ಶೇಖರಣೆಯ ವ್ಯವಸ್ಥೆಯನ್ನು ಬಹಳ ಬದಲಾಯಿಸಬೇಕಾಗುತ್ತದೆ.

ಆರ್.ಎನ್.ಎ. ಲಸಿಕೆಗಳ ಕಾರ್ಯಸೂಚಿ

ನಮ್ಮ ದೇಶದ ಭಾರತ್ ಬಯೊಟೆಕ್ ಕೂಡ ಲಸಿಕೆಗಳ ಅಭಿವೃದ್ಧಿಯಲ್ಲಿದೆ. ರೆಬೀಸ್‍ನಂತಹ ವೈರಸ್ ಕಾಯಿಲೆಗಳಿಗೆ, ಕಾಯಿಲೆಕಾರಕ ವೈರಸ್ಸನ್ನು ನಿಷ್ಕ್ರಿಯಗೊಳಿಸಿ, ಅದರ ರೋಗಕಾರಕ ಸಾಮಥ್ರ್ಯವನ್ನು ತೆಗೆದುಹಾಕಲಾಗುತ್ತದೆ. ಇಂತಹ ನಿಷ್ಕ್ರಿಯ ವೈರಸ್ ಶರೀರದ ಒಳಗೆ ತನ್ನ ಸಂಖ್ಯೆಯನ್ನು ವೃದ್ಧಿಸಲಾರದು. ಇವು ಕಾಯಿಲೆ ತರಲಾರವಾದರೂ, ಶರೀರದಲ್ಲಿ ಕಾಯಿಲೆಯ ವಿರುದ್ಧ ನಿರೋಧಕ ಸಾಮಥ್ರ್ಯವನ್ನು ಉದ್ದೀಪನಗೊಳಿಸಬಲ್ಲವು. ಕೋವಿಡ್-19 ಕಾಯಿಲೆಗೆ ಕೂಡ ಇಂತಹುದೇ ಲಸಿಕೆಯನ್ನು ಭಾರತ್ ಬಯೊಟೆಕ್ ಪರೀಕ್ಷೆ ಮಾಡುತ್ತಿದೆ. ಈ ಲಸಿಕೆಗಳ ಸಂಗ್ರಹಣೆ ಸರಳ; ಪ್ರಸ್ತುತ ಲಭ್ಯವಿರುವ ವ್ಯವಸ್ಥೆಯೇ ಸಾಕು. ಇದು ಸಫಲವಾದರೆ ಕೋವಿಡ್-19 ವಿರುದ್ಧ ಹೋರಾಡಲು ನಮ್ಮ ದೇಶದಲ್ಲೇ ತಯಾರಾದ ದೊಡ್ಡ ಅಸ್ತ್ರ ಸಿಕ್ಕಂತೆ.

ರಷ್ಯಾ ದೇಶದ ಸ್ಪುತ್ನಿಕ್ ಲಸಿಕೆ ಮತ್ತು ನಮ್ಮ ದೇಶದ ಸೀರಮ್ ಇನ್ಸ್ಟಿಟ್ಯೂಟ್ ಸಂಸ್ಥೆ ತಯಾರಿಸಿರುವ ಕೋವಿಶೀಲ್ಡ್ ಲಸಿಕೆ ಕೂಡ ಆಕ್ಸ್’ಫರ್ಡ್ ವಿಶ್ವವಿದ್ಯಾಲಯದ ಕೋವಿಡ್-19 ಲಸಿಕೆಯಂತಹ ತಂತ್ರಜ್ಞಾನವನ್ನು ಅವಲಂಬಿಸಿದೆ. ರಷ್ಯಾದ ಲಸಿಕೆ ಅಡೆನೊವೈರಸ್ ಎಂಬ ವೈರಸ್ಸಿನ ಒಳಗೆ ಕೋವಿಡ್-19ರ ಆರ್.ಎನ್.ಎ ಜೀವದ್ರವ್ಯದ ಭಾಗಶಃ ಅಂಶವನ್ನು ಸೇರಿಸಿ ಬಳಸಿದರೆ, ಸೀರಮ್ ಸಂಸ್ಥೆ ಇದಕ್ಕೆ ಹೆಪಟೈಟಿಸ್-ಬಿ ಎಂಬ ಯಕೃತ್ತಿನ ಸೋಂಕು ಉಂಟುಮಾಡುವ ವೈರಸ್ ಕೋಶವನ್ನು ಬಳಸುತ್ತಿದೆ. ಈ ರೀತಿಯ ವೈರಸ್ಸುಗಳು ಶರೀರದ ಒಳಗೆ ಸೇರಿದಾಗ ತಮ್ಮ ಸಂಖ್ಯೆಯನ್ನು ವೃದ್ಧಿಸಲಾರದಂತೆ ನಿರ್ಮಿಸಲಾಗಿವೆ. ಅಂದರೆ, ಲಸಿಕೆಯ ಡೋಸ್‍ನಲ್ಲಿ ಎಷ್ಟು ಸಂಖ್ಯೆಯ ವೈರಸ್ ನೀಡಲಾಗುತ್ತದೆಯೋ, ಅಷ್ಟೇ ಸಂಖ್ಯೆಯ ವೈರಸ್ ಮಾತ್ರ ಕೆಲಸ ಮಾಡಬಲ್ಲವು. ಆ ಸಂಖ್ಯೆ ಶರೀರದ ಒಳಗೆ ವೃದ್ಧಿಯಾಗುವುದಿಲ್ಲ. ಇದಕ್ಕೆ ಪ್ರತಿಯಾಗಿ, ಇಸ್ರೇಲ್ ದೇಶದ ಬಯಲಾಜಿಕಲ್ ರಿಸರ್ಚ್ ಸಂಸ್ಥೆ ಶರೀರದ ಒಳಗೆ ಸಂಖ್ಯೆಯಲ್ಲಿ ವೃದ್ಧಿಸಬಲ್ಲ ವೈರಸ್ ಕೋಶಗಳನ್ನು ಹೊಂದಿರುವ ಲಸಿಕೆಯನ್ನು ತಯಾರಿಸುತ್ತಿದೆ.

ನಮ್ಮ ದೇಶದ ಬಯಾಲಾಜಿಕಲ್-ಇ ಸಂಸ್ಥೆ ಮತ್ತೊಂದು ರೀತಿಯ ತಂತ್ರಜ್ಞಾನದ ಬಳಕೆ ಮಾಡಿದೆ. ಕೋವಿಡ್-19 ವೈರಸ್ಸಿನ ಆರ್.ಎನ್.ಎ ಜೀವದ್ರವ್ಯವನ್ನು ಕಾಪಾಡಲು ಅದರ ಸುತ್ತಾ ಒಂದು ಪ್ರೊಟೀನ್ ಗೋಡೆಯಿದೆ. ಗೋಡೆಯ ಮೇಲೆ ತೆಳ್ಳನೆಯ ಜಿಡ್ಡಿನ ಪದರವಿದೆ. ಇವೆಲ್ಲವೂ ಸೇರಿ ಕೋವಿಡ್-19 ವೈರಸ್ ಆಗುತ್ತದೆ. ಈ ಪ್ರೊಟೀನ್ ಗೋಡೆಯ ಭಾಗಶಃ ಅಂಶವನ್ನು ಪ್ರತ್ಯೇಕಿಸಿ, ಅದು ಶರೀರದಲ್ಲಿ ಎಷ್ಟರ ಮಟ್ಟಿಗೆ ರಕ್ಷಕ ವ್ಯವಸ್ಥೆಯನ್ನು ಉದ್ದೀಪನಗೊಳಿಸುತ್ತದೆ ಎಂದು ಮೊದಲು ಪರೀಕ್ಷಿಸಲಾಗುತ್ತದೆ. ಈ ಪ್ರಕ್ರಿಯೆಯಲ್ಲಿ ಕೋವಿಡ್-19 ವೈರಸ್ ನ ಯಾವ ಪ್ರೊಟೀನ್ ತುಣುಕು ಅತ್ಯಂತ ಸಫಲವಾಗಿ ಕೆಲಸ ಮಾಡುತ್ತದೋ, ಅದರ ರಚನೆಯನ್ನು ಪ್ರಯೋಗಾಲಯದಲ್ಲಿ ನಿಷ್ಕರ್ಷೆ ಮಾಡಲಾಗುತ್ತದೆ. ಈಗ, ಜೆನೆಟಿಕ್ ತಂತ್ರಜ್ಞಾನದ ಮೂಲಕ ಅಂತಹುದೇ ಪ್ರೊಟೀನ್ ತುಣುಕನ್ನು ತಯಾರಿಸುವಂತೆ ಬೇರೆ ಸೂಕ್ಷ್ಮಾಣುಜೀವಿಗಳನ್ನು ನಿರ್ದೇಶಿಸಲಾಗುತ್ತದೆ. ಇದರಿಂದ ರಕ್ಷಕ ವ್ಯವಸ್ಥೆಯನ್ನು ಪ್ರಚೋದಿಸಬಲ್ಲ ವೈರಸ್ ಕವಚದ ಪ್ರೊಟೀನ್ ತುಣುಕು ದೊಡ್ಡ ಸಂಖ್ಯೆಯಲ್ಲಿ ತಯಾರಾಗುತ್ತದೆ.

ಇದನ್ನು ಬಳಸಿ ಲಸಿಕೆ ತಯಾರಿಸಿ ಚುಚ್ಚಿದರೆ, ಶರೀರದ ರಕ್ಷಕ ವ್ಯವಸ್ಥೆ ಅಸಲೀ ಕೋವಿಡ್-19 ವೈರಸ್ ವಿರುದ್ಧ ಹೊಡೆದಾಡಲು ಸನ್ನದ್ಧವಾಗುತ್ತದೆ. ಇಂತಹ ಲಸಿಕೆಗಳನ್ನು ಬಹಳ ಜಾಗರೂಕವಾಗಿ, ಕಲ್ಮಶರಹಿತ ವಾತಾವರಣದಲ್ಲಿ ತಯಾರಿಸಬೇಕು. ಆದರೆ, ಈ ರೀತಿ ತಯಾರಿಸಬಲ್ಲ ತಂತ್ರಜ್ಞಾನ ಈಗಾಗಲೇ ಲಭ್ಯವಿದೆ.

ಒಟ್ಟಿನಲ್ಲಿ, ಕೋವಿಡ್-19 ವಿರುದ್ಧ ಸಾಲು-ಸಾಲು ಲಸಿಕೆಗಳು 2021 ರಲ್ಲಿ ದೊರೆಯಲಿದೆ. ಜೊತೆಗೆ, ಕೋವಿಡ್-19 ಸೋಂಕಿನ ವಿರುದ್ಧ ಪರಿಣಾಮಕಾರಿ ಔಷಧವೂ ಲಭ್ಯವಾಗಬಹುದು. ಆ ನಿಟ್ಟಿನಲ್ಲೂ ಸಾಕಷ್ಟು ಕೆಲಸಗಳು ನಡೆಯುತ್ತಿವೆ. ವೈದ್ಯ ಜಗತ್ತು ಈಗ ಕೋವಿಡ್-19 ಚಿಕಿತ್ಸೆಯ ಬಗ್ಗೆ ಗಣನೀಯ ಅನುಭವ ಗಳಿಸಿದೆ. ಕೋವಿಡ್-19 ರ ತೀವ್ರವಾದ ಸೋಂಕನ್ನೂ ಪರಿಣಾಮಕಾರಿಯಾಗಿ ನಿಯಂತ್ರಿಸಬಲ್ಲ ವ್ಯವಸ್ಥಿತ ವಿಧಾನಗಳು ತಯಾರಾಗಿವೆ. ಜನಸಾಮಾನ್ಯರಿಗೂ ಈ ಬಗ್ಗೆ ಸಾಕಷ್ಟು ಮಾಹಿತಿ ತಿಳಿದಿರುವುದರಿಂದ, ಕಾಯಿಲೆಯ ಆರಂಭದ ಹಂತದಲ್ಲೇ ವೈದ್ಯಕೀಯ ನೆರವು ಪಡೆಯುತ್ತಿದ್ದಾರೆ.

ಇವೆಲ್ಲ ಪರಿಣಾಮಗಳಿಂದ ಕೋವಿಡ್-19 ಸೋಂಕಿನ ಮರಣದ ಪ್ರಮಾಣ ಇಳಿದಿದೆ. ಮಾಸ್ಕ್ ಧರಿಸುವುದರ ಬಗ್ಗೆ ಸರ್ಕಾರ ಕಟ್ಟುನಿಟ್ಟಿನ ನಿರ್ಧಾರ ತಳೆದಿದೆ. ಅನೇಕ ದೇಶಗಳಲ್ಲಿ 2021ನೆಯ ವರ್ಷ ಕೋವಿಡ್-19 ಕಾಯಿಲೆಯ ಅಂತ್ಯವನ್ನು ಕಾಣಬಹುದು ಎಂಬ ಆಶಾಭಾವ ಜಾಗೃತವಾಗಿದೆ. ಅಂತಹ ದೇಶಗಳ ಪಟ್ಟಿಯಲ್ಲಿ ನಮ್ಮ ದೇಶದ ಹೆಸರು ಕೂಡ ಇರುವುದೇ ನಮ್ಮ ಧ್ಯೇಯವಾಗಬೇಕು. ಅದಕ್ಕೆ ಪ್ರತಿಯೊಬ್ಬರ ಸಂಘಟಿತ ಪ್ರಯತ್ನ ಅತ್ಯಗತ್ಯ. 2021 ರಲ್ಲಿ ಕೋವಿಡ್-19 ಸೋಂಕನ್ನು ನಾವೆಲ್ಲರೂ ಸಾಂಘಿಕವಾಗಿ ಗೆಲ್ಲುವಂತಾಗಲಿ ಎಂಬ ಹಾರೈಕೆಯಿದೆ.

*ಲೇಖಕರು ವೃತ್ತಿಯಿಂದ ವೈದ್ಯರು; ವೈದ್ಯಕೀಯ ಮಾಹಿತಿಗಳನ್ನು ಜನಸಾಮಾನ್ಯರಿಗೆ ತಿಳಿಸುವ ವಿಷಯದಲ್ಲಿ ಆಸಕ್ತರು. ವೈದ್ಯಕೀಯ ಇತಿಹಾಸದಲ್ಲಿ ಆಕಸ್ಮಿಕ ಘಟನೆಗಳನ್ನು ಕುರಿತ “ಸೆರೆಂಡಿಪಿಟಿ” ಕನ್ನಡ ಇ-ಪುಸ್ತಕ ಅಂತರ್ಜಾಲದಲ್ಲಿ ಉಚಿತವಾಗಿ ಲಭ್ಯ.

Leave a Reply

Your email address will not be published.